ఎక్కడైనా, ఎప్పుడైనా... రియల్ ఎస్టేట్ ను ప్రభావితం చేసే అంశాలు ఇవే!

భారతదేశంలో అనుభవజ్ఞులైన రియల్ ఎస్టేట్ ఇన్వెస్టర్లు "మార్కెట్‌ను పట్టించుకోకండి, మ్యాప్‌ను కొనండి" అనే సూత్రాన్ని పాటిస్తుంటారు. ప్రభుత్వాలు మౌలిక సదుపాయాల ప్రాజెక్టులను ప్రకటించినప్పుడు ఈ సూత్రం మరింత ప్రాధాన్యత సంతరించుకుంటుంది. హైవేల పక్కన, పారిశ్రామిక ప్రాజెక్టులు, ఎయిర్ పోర్టుల పక్కన స్థలాలకు విపరీతమైన డిమాండ్ ఉండడమే ఈ సిద్ధాంతానికి నిదర్శనం. 

దేశవ్యాప్తంగా విస్తరిస్తున్న ఎక్స్‌ప్రెస్‌వేలు, కొత్తగా వస్తున్న ఎయిర్‌పోర్టులు, మెట్రో నెట్‌వర్క్‌లు కేవలం ప్రయాణ సౌకర్యాలను మెరుగుపరచడమే కాదు, రియల్ ఎస్టేట్ ముఖచిత్రాన్ని సమూలంగా మార్చేస్తున్నాయి. నగరాల సరిహద్దులను చెరిపేస్తూ, ఒకప్పుడు మారుమూలలుగా ఉన్న ప్రాంతాలను నేడు పెట్టుబడులకు స్వర్గధామాలుగా మారుస్తున్నాయి.

మౌలిక వసతులతో రియల్ ఎస్టేట్ గమనం
ప్రభుత్వం మౌలిక వసతుల కల్పనపై భారీగా దృష్టి సారించింది. ఎకనామిక్ సర్వే 2025-26 ప్రకారం, 2014 నుంచి జాతీయ రహదారుల నెట్‌వర్క్ దాదాపు 60% విస్తరించింది. హై-స్పీడ్ కారిడార్ల పొడవు 100 కిలోమీటర్ల నుంచి 5,000 కిలోమీటర్లకు పెరిగింది. 2026-27 బడ్జెట్‌లోనూ మూలధన వ్యయాన్ని 11.5% పెంచి రూ.12.2 లక్షల కోట్లకు చేర్చారు. 

ఈ ప్రాజెక్టుల ప్రకటన వెలువడిన వెంటనే ఆయా ప్రాంతాల్లో భూముల ధరలు ఒక్కసారిగా పెరుగుతాయి. ప్రాజెక్టు పనులు ఆలస్యమైతే ధరలు కొంత తగ్గుముఖం పడతాయి, కానీ ప్రాజెక్టు పూర్తయి, అందుబాటులోకి రాగానే ధరలు మళ్ళీ ఉవ్వెత్తున ఎగసిపడతాయి. ఇది రియల్ ఎస్టేట్‌లో ఒక సాధారణ చక్రం.

ముంబైలో కొత్త కనెక్టివిటీ.. కొత్త డిమాండ్
దేశ ఆర్థిక రాజధాని ముంబైలో ఈ మార్పు స్పష్టంగా కనిపిస్తోంది. ఒకప్పుడు నగరానికి దూరంగా భావించిన నవీ ముంబై, ఇప్పుడు ముంబై ట్రాన్స్ హార్బర్ లింక్ (ఎంటీహెచ్ఎల్) రాకతో హాట్ కేక్‌గా మారింది. ప్రతిపాదిత నవీ ముంబై అంతర్జాతీయ విమానాశ్రయం, మెట్రో విస్తరణతో ఇక్కడ ఇళ్లకు డిమాండ్ విపరీతంగా పెరిగింది. మరోవైపు, ముంబై కోస్టల్ రోడ్ ప్రాజెక్టు దక్షిణ ముంబైకి కొత్త కళను తీసుకొచ్చింది. దీంతో బాంద్రా కుర్లా కాంప్లెక్స్ నుంచి మెరైన్ డ్రైవ్ వరకు కనెక్టివిటీ మెరుగుపడి, వర్లీ, నారిమన్ పాయింట్ వంటి ప్రాంతాల్లో అల్ట్రా-లగ్జరీ ఇళ్ల అమ్మకాలు ఊపందుకున్నాయి.

ఢిల్లీ-ఎన్‌సీఆర్‌లో ఇన్‌ఫ్రా మ్యాజిక్
ఢిల్లీ-ఎన్‌సీఆర్ ప్రాంతంలో మౌలిక వసతుల కల్పన, రియల్ ఎస్టేట్ రంగంలో కొత్త నమ్మకాన్ని నింపింది. నోయిడాలో రాబోయే అంతర్జాతీయ విమానాశ్రయం ఈ మార్పుకు కేంద్ర బిందువుగా నిలిచింది. ఫలితంగా 2025లో నోయిడాలో ఇళ్ల ధరలు ఏకంగా 36% పెరిగాయి. యమునా ఎక్స్‌ప్రెస్‌వే పరిసర ప్రాంతాలు రీ-రేటింగ్‌కు గురవుతున్నాయి. 

ఒకప్పుడు గ్రేడ్-A డెవలపర్లు వెనుకాడిన ఈ మార్కెట్‌లో ఇప్పుడు గోద్రెజ్, ఎల్&టీ రియల్టీ వంటి సంస్థలు లగ్జరీ ప్రాజెక్టులను ప్రారంభిస్తున్నాయి. గురుగ్రామ్‌లో ద్వారకా ఎక్స్‌ప్రెస్‌వే పూర్తికావడంతో సేల్స్ విలువ ఒక్క ఏడాదిలోనే రూ.383 కోట్ల నుంచి రూ.8,347 కోట్లకు పెరిగింది. సోహ్నా ఎలివేటెడ్ కారిడార్ ప్రయాణ సమయాన్ని తగ్గించడంతో ఆ ప్రాంతం కూడా పెట్టుబడిదారులను ఆకర్షిస్తోంది.

మెట్రో నగరాలకు మించి..
ఈ ప్రభావం కేవలం ప్రధాన నగరాలకే పరిమితం కాలేదు. బెంగళూరు ఉత్తర ప్రాంతంలో (హెబ్బాల్, యలహంక, ఎయిర్‌పోర్ట్ బెల్ట్) గత కొన్నేళ్లుగా ధరలు రెండంకెల వృద్ధిని నమోదు చేస్తున్నాయి. గోవాలో మనోహర్ అంతర్జాతీయ విమానాశ్రయం రాకతో ఉత్తర గోవా రియల్ ఎస్టేట్ కార్యకలాపాలకు కేంద్రంగా మారింది. అద్దెలకు డిమాండ్ పెరిగి 4-6 శాతం వరకు రాబడి వస్తోంది. ఇక ఢిల్లీ-డెహ్రాడూన్ ఎక్స్‌ప్రెస్‌వే ప్రయాణ సమయాన్ని తగ్గించడంతో రిషికేశ్, మసూరీలలో వీకెండ్ హోమ్స్ డిమాండ్ పెరిగింది.

ఓర్పు చాలా ముఖ్యం 
మౌలిక వసతులు విలువను సృష్టిస్తాయనడంలో సందేహం లేదు. కానీ, ఈ ప్రక్రియ తక్షణం జరగదు. భూసేకరణ, అనుమతులు, నిర్మాణంలో జాప్యం సర్వసాధారణం. చాలా సందర్భాల్లో జీవన సౌకర్యాలు (పాఠశాలలు, ఆసుపత్రులు) అందుబాటులోకి రాకముందే ధరలు ఆకాశాన్నంటుతాయి. సరఫరా ఒక్కోసారి డిమాండ్‌ను మించిపోవచ్చు. అందుకే, ఇలాంటి ప్రాజెక్టుల ఆధారంగా పెట్టుబడులు పెట్టేవారు దీర్ఘకాలిక దృక్పథంతో, ఓపికతో ఉండాలని నిపుణులు సూచిస్తున్నారు. సరైన ప్రణాళిక, సహనంతో ఉంటే ఇన్‌ఫ్రా ఆధారిత రియల్ ఎస్టేట్ పెట్టుబడులు మంచి లాభాలను అందిస్తాయి.